ઉત્તર પ્રદેશના ગ્રેટર નોઈડાના ફેઝ 2 વિસ્તારમાં પગાર વધારાની માંગણી સાથે પ્રદર્શન કરી રહેલા કર્મચારીઓએ આજે રૌદ્ર સ્વરૂપ ધારણ કર્યું હતું. છેલ્લા 4 દિવસથી શાંતિપૂર્ણ ચાલી રહેલું આ આંદોલન અચાનક હિંસક બનતા સમગ્ર વિસ્તારમાં તણાવ ફેલાયો છે. કંપનીથી નારાજ કર્મચારીઓએ ઉગ્ર વિરોધ પ્રદર્શન દરમિયાન નવી ગાડીઓમાં તોડફોડ કરી હતી અને કેટલીક ગાડીઓને આગના હવાલે કરી દીધી હતી, જેના કારણે કંપનીને મોટા પાયે આર્થિક નુકસાન પહોંચ્યું છે.

ઘટનાની જાણ થતા જ સ્થિતિ પર કાબૂ મેળવવા પહોંચેલી પોલીસ ટીમ સાથે પણ કર્મચારીઓએ ઘર્ષણ કર્યું હતું. ઉશ્કેરાયેલા ટોળાએ પોલીસની ગાડીમાં તોડફોડ કરી તેને પલટી દીધી હતી અને પોલીસ જવાનો પર પથ્થરમારો પણ કર્યો હતો. આ હિંસક અથડામણને પગલે વહીવટી તંત્રમાં દોડધામ મચી ગઈ હતી અને પરિસ્થિતિને થાળે પાડવા માટે ઘટનાસ્થળે પોલીસનો મોટો કાફલો તૈનાત કરવામાં આવ્યો છે. હાલ પોલીસની હાજરીને કારણે સ્થિતિ નિયંત્રણમાં હોવાનું જાણવા મળ્યું છે.

કર્મચારીઓનો મુખ્ય આરોપ છે કે હરિયાણા સરકાર દ્વારા લઘુત્તમ વેતનમાં 35 ટકાનો વધારો કરવામાં આવ્યો હોવા છતાં નોઈડાની આ કંપનીઓ વેતન વધારો આપવા તૈયાર નથી. કર્મચારીઓએ સમાન કામ માટે સમાન પગાર, ઓવરટાઇમ માટે બમણું વળતર, દર મહિને સમયસર પગારની ચુકવણી અને કાર્યસ્થળ પર સલામતી તેમજ ઉત્પીડન સામે કડક કાર્યવાહી જેવી પડતર માંગણીઓ સરકાર અને કંપની સમક્ષ મૂકી છે.

કંપનીના સત્તાધીશોએ કર્મચારીઓની માંગણીઓનો સ્વીકાર ન કરતા વિવાદ વણસ્યો હતો. આ પ્રદર્શન દરમિયાન કર્મચારીઓએ કંપનીની મિલકતોને પણ નુકસાન પહોંચાડ્યું છે. પોલીસ હવે આ હિંસક તોડફોડ અને આગજનીમાં સામેલ તત્વોની ઓળખ કરી કાયદેસરની કાર્યવાહી કરવાની તૈયારી કરી રહી છે. બીજી તરફ, કર્મચારીઓ હજુ પણ પોતાની માંગણીઓ પર મક્કમ હોવાથી આગામી સમયમાં આ વિવાદ વધુ ગંભીર બને તેવી શક્યતા દેખાઈ રહી છે.