શ્રીનગરઃ જમ્મુ-કાશ્મીરના પહાડી જિલ્લાઓ ડોડા અને કિશ્તવાડમાં ભારે વરસાદ બાદ વાદળ ફાટવાની અને અચાનક પૂર આવવાની ઘટનાઓ સામે આવી છે, જેના કારણે સ્થાનિક લોકોની મુશ્કેલીઓમાં ભારે વધારો થયો છે. ડોડાના ઠઠરી વિસ્તાર તેમજ કિશ્તવાડ જિલ્લાના સરથલ અને માછીપાલ વિસ્તારોમાં મુશળધાર વરસાદને કારણે પૂર જેવી સ્થિતિ સર્જાઈ હતી. અનેક સ્થળોએ ભૂસ્ખલન થતાં પથ્થરો રસ્તા પર આવી ગયા હતા, જેના કારણે વાહનવ્યવહાર સંપૂર્ણપણે ખોરવાઈ ગયો હતો.

આ કુદરતી આપત્તિની સૌથી વધુ અસર કિશ્તવાડ-ડોડા રાષ્ટ્રીય રાજમાર્ગ-244 પર પડી હતી. પહાડો પરથી મોટા પથ્થરો અને કાટમાળ ધસી આવવાને કારણે આ મુખ્ય માર્ગ અનેક જગ્યાએ બંધ થઈ ગયો હતો. ભૂસ્ખલનના કારણે રસ્તા પર આવેલા કાટમાળથી વાહનોની અવરજવર થંભી ગઈ હતી અને કેટલાક વાહનોને નુકસાન પણ પહોંચ્યું હોવાના અહેવાલ મળ્યા હતા.

ભારે વરસાદ અને પૂરની સ્થિતિ વચ્ચે ફસાયેલા લોકોને વહીવટીતંત્ર દ્વારા તાત્કાલિક સુરક્ષિત સ્થળોએ ખસેડવામાં આવ્યા હતા. રાહત અને બચાવ કામગીરીની ટીમો પ્રભાવિત વિસ્તારોમાં સતત કાર્યરત હતી. જ્યાં રસ્તાઓ બંધ થયા હતા ત્યાં જેસીબી અને અન્ય મશીનોની મદદથી કાટમાળ હટાવવાની કામગીરી યુદ્ધના ધોરણે શરૂ કરવામાં આવી હતી. ખરાબ હવામાન, તેજ પવન અને કરા સાથેના વરસાદને કારણે મિલકતોને પણ નુકસાન પહોંચ્યું હતું. જોકે, હજુ સુધી પૂર કે ભૂસ્ખલનના કારણે કોઈ મોટી જાનહાનિના સમાચાર સામે આવ્યા નથી.