દિલ્હીના બુરાડી વિસ્તારમાં માનવતાને લાંછન લગાડતી એક ઘટના સામે આવી છે, જેમાં એક નરાધમ પિતાએ પોતાની જ સગી દીકરી પર છેલ્લા 10 વર્ષ સુધી બળાત્કાર ગુજાર્યો હોવાનું બહાર આવ્યું છે. હાલ 21 વર્ષની થઈ ચૂકેલી પીડિત યુવતી જ્યારે માત્ર 11 વર્ષની હતી, ત્યારથી તેના પિતા દ્વારા તેનું સતત જાતીય શોષણ કરવામાં આવતું હતું. જાન્યુઆરી 2015 માં જ્યારે યુવતીની માતા ગામ ગઈ હતી, ત્યારે પિતાએ પ્રથમવાર આ હીન કૃત્ય આચર્યું હતું. ડર અને અજ્ઞાનતાના કારણે યુવતી આટલા વર્ષો સુધી આ ભયાનક સત્ય કોઈને કહી શકી નહોતી. 

આ નરાધમ પિતાના અત્યાચારથી કંટાળીને યુવતીએ અગાઉ આત્મહત્યાનો પ્રયાસ પણ કર્યો હતો, પરંતુ તેમાં તે નિષ્ફળ રહી હતી. જ્યારે તેણે 16 વર્ષની ઉંમરે પોતાની માતાને આ વિશે જણાવ્યું, ત્યારે માતાએ દીકરીને ન્યાય અપાવવાને બદલે તેને ચૂપ કરાવી દીધી હતી. વર્ષ 2018 માં યુવતીએ બિલાસપુરની એઈમ્સ હોસ્પિટલમાં ડોક્ટરને પોતાની આપવીતી જણાવી ત્યારે પણ તેની માતાએ તેને રૂમમાં પૂરી દઈને ધમકાવી હતી અને ડોક્ટર સામે દબાણ હેઠળ ખોટું બોલવા મજબૂર કરી હતી. 

પરિવારના સાથના અભાવે યુવતીએ જાતે જ લડત આપવાનું નક્કી કર્યું અને પોતાના રૂમમાં ગુપ્ત રીતે મોબાઈલ કેમેરા ગોઠવીને પુરાવા એકત્ર કરવાનું શરૂ કર્યું હતું. લગભગ એક વર્ષની મહેનત બાદ તેણે પિતાના કાળા કરતૂતોના અસંખ્ય વિડિયો ફૂટેજ મેળવ્યા હતા. ગત એપ્રિલમાં તેણે એક મિત્રની મદદથી પોલીસનો સંપર્ક કર્યો, જેના આધારે પોલીસે તાત્કાલિક કાર્યવાહી કરીને આરોપી પિતાની ધરપકડ કરી તેને જેલમાં ધકેલી દીધો છે. હાલ પોલીસ આ મામલે માતાની ભૂમિકાની પણ તપાસ કરી રહી છે.