અમદાવાદ-વડોદરા એક્સપ્રેસવે પર વડોદરા જિલ્લાના સાવલી તાલુકાના પોઈચા નજીક હાઈવેની પહેલી લેનમાં પૂરઝડપે રિવર્સ આવી રહેલા એક બોલેરો પીકઅપ વાહનની પાછળ ઈકો કાર ઘૂસી જતાં કાળમુખો અકસ્માત સર્જાયો હતો. આ અકસ્માતના કારણે ઈકો કારમાં અચાનક ભયાનક આગ લાગી ગઈ હતી. કાર ચલાવી રહેલા ચાલકનો પગ સ્ટીયરિંગ નીચે ફસાઈ જતાં તેમને બહાર નીકળવાનો સમય મળ્યો ન હતો અને તેઓ આગની જ્વાળાઓમાં હોમાઈ ગયા હતા. પત્ની, માતા અને 3 બાળકોની નજર સામે જ તેઓ જીવતા ભડથું થઈ જતાં પરિવાર પર આભ તૂટી પડ્યું હતું.

મળતી વિગત પ્રમાણે, મૂળ મહુવાના અને હાલ મહેસાણાના પિલવાઈ ગામે રહેતા સવિતાબેન પરમારે આ ઘટના અંગે પોલીસમાં ફરિયાદ નોંધાવી હતી. તેમના દીકરી, જમાઈ જગદીશભાઈ, વેવાણ અને 3 બાળકો ઈકો કાર લઈને પિલવાઈ ગામે મહેમાનગતિએ આવ્યા હતા. 9 જૂનના રોજ આ આખો પરિવાર ઈકો કારમાં પિલવાઈથી વડોદરા જવા નીકળ્યો હતો. આ દરમિયાન એક્સપ્રેસ હાઈવે પર એક કટ નજીક બોલેરો પીકઅપનો ડ્રાઈવર પૂરઝડપે રિવર્સ ગાડી ચલાવી રહ્યો હતો, જેના કારણે પાછળથી આવતી ઈકો કાર આ પીકઅપ સાથે ધડાકાભેર અથડાઈ હતી.

અકસ્માત થતાં જ કારમાં લાગેલી આગમાંથી સવિતાબેન, તેમની દીકરી, વેવાણ અને 3 બાળકો સમયસર બહાર નીકળી જતાં તેમનો આબાદ બચાવ થયો હતો. પરંતુ કાર ચલાવી રહેલા જમાઈ જગદીશભાઈ બહાર ન નીકળી શક્યા અને આગ એટલી ઝડપથી ફેલાઈ કે આખા પરિવારની નજર સામે જ તેઓ કારની અંદર ભડથું થઈ ગયા હતા અને તેમનું મોત નીપજ્યું હતું. ઘટનાની જાણ થતાં જ પોલીસ અને ફાયર બ્રિગેડની ટીમ દોડી આવી હતી અને ભારે જહેમત બાદ આગ પર કાબૂ મેળવ્યો હતો. અકસ્માતના કારણે થોડીવાર માટે સર્જાયેલા ટ્રાફિક જામને પોલીસે આવીને ક્લિયર કરાવ્યો હતો.