મધ્યપૂર્વના દેશોમાં ચાલી રહેલા યુદ્ધની વિપરીત અસરો વચ્ચે પણ ભારતીય અર્થતંત્રએ પોતાની મજબૂતી જાળવી રાખી છે. મે મહિનામાં ભારતના ઔદ્યોગિક ઉત્પાદનમાં ગત વર્ષના સમાન સમયગાળાની સરખામણીમાં 5.1 ટકાનો નોંધપાત્ર વધારો નોંધાયો છે. આ વિકાસને પગલે દેશનો ઔદ્યોગિક ઉત્પાદન સૂચકાંક ગત વર્ષના 116.7ની સામે આ વર્ષે મે મહિનામાં 122.7 પર પહોંચી ગયો છે. આર્થિક પડકારો છતાં ભારતીય ઉદ્યોગોએ સકારાત્મક ગતિ જાળવી રાખીને વૈશ્વિક સ્તરે ઉત્તમ પ્રદર્શન કર્યું છે.

ઔદ્યોગિક ઉત્પાદન ક્ષેત્રે મળેલી આ સફળતા પાછળ વિનિર્માણ, વીજળી અને ગેસ પુરવઠા ક્ષેત્રનું યોગદાન સૌથી મોટું રહ્યું છે. ઉત્પાદન ક્ષેત્રે સૌથી વધુ હિસ્સો ધરાવતા વિનિર્માણ ઉદ્યોગમાં મે મહિનામાં 5.5 ટકાનો વધારો જોવા મળ્યો હતો. આ ઉપરાંત વીજળી અને ગેસ પુરવઠા ક્ષેત્રે 9.9 ટકાની શાનદાર તેજી નોંધાઈ છે. સાથે જ પાણી પુરવઠા અને કચરાના નિકાલના વ્યવસ્થાપન ક્ષેત્રે પણ 5.5 ટકાની વૃદ્ધિ હાંસલ કરી છે. જોકે, બીજી તરફ ખાણકામ ક્ષેત્રનું પ્રદર્શન થોડું નબળું રહ્યું હતું અને તેમાં 1.6 ટકાનો ઘટાડો નોંધવામાં આવ્યો છે.

વિનિર્માણ ક્ષેત્રના કુલ 23 જૂથોમાંથી 16 જૂથોએ હકારાત્મક વૃદ્ધિ દર્શાવી છે. જેમાં સૌથી મોટો ફાયદો વીજળીના ઉપકરણો બનાવતા ઉદ્યોગને થયો છે, જેણે 20.8 ટકાનો જંગી ઉછાળો નોંધાવ્યો છે. મોટરગાડીઓ અને તેને લગતા સાધનોના ઉત્પાદનમાં 14.5 ટકા, જ્યારે મૂળભૂત ધાતુઓના ક્ષેત્રમાં 4.6 ટકાનો વધારો થયો છે. વધુમાં મૂડીગત સામાનમાં 12.9 ટકા, ટકાઉ વપરાશી વસ્તુઓમાં 7.2 ટકા, માળખાગત અને બાંધકામ સામગ્રીમાં 5.9 ટકા તથા મધ્યવર્તી સામાનમાં 5.8 ટકાની વૃદ્ધિ જોવા મળી છે. પ્રાથમિક વસ્તુઓ અને રોજબરોજની વપરાશી વસ્તુઓમાં અનુક્રમે 2.6 ટકા અને 3.6 ટકાનો વધારો થયો છે.

આ વખતે મંત્રાલય દ્વારા ગણતરીની પદ્ધતિમાં પણ કેટલાક મહત્વપૂર્ણ ફેરફારો કરવામાં આવ્યા છે. હવે નવી શ્રેણી માટે 2022-23ને આધાર વર્ષ તરીકે લેવામાં આવ્યું છે અને જથ્થાબંધ ભાવ સૂચકાંકની જગ્યાએ ઉત્પાદકોના ભાવ સૂચકાંકનો ઉપયોગ શરૂ કરાયો છે. આ નવો બદલાવ ઔદ્યોગિક ઉત્પાદન સૂચકાંકની યાદીમાં સામેલ કુલ 463 વસ્તુઓમાંથી 234 વસ્તુઓ પર લાગુ કરવામાં આવ્યો છે, જે કુલ ગણતરીમાં 36.02 ટકા જેટલું મહત્વ ધરાવે છે.