વિરોધ પ્રદર્શન કરી રહેલા વિદ્યાર્થીઓ સામે દિલ્હી પોલીસની કાર્યવાહી સંબંધિત તાત્કાલિક અરજી પર સુપ્રીમ કોર્ટે સુનાવણી કરવાનો ઇનકાર કર્યો છે. અરજદાર તરફથી કોર્ટને દિલ્હી પોલીસની કાર્યવાહીનો વીડિયો જોવા અને આ મામલે સુઓ મોટો સંજ્ઞાન લેવા વિનંતી કરવામાં આવી હતી. જોકે, ચીફ જસ્ટિસ ઓફ ઈન્ડિયા (CJI) સૂર્યકાંતે સ્પષ્ટ કહ્યું કે કોર્ટ પાસે વીડિયો જોવા માટે સમય નથી અને આ પ્રકારની રજૂઆત પર તાત્કાલિક સુનાવણી શક્ય નથી.

સુનાવણી દરમિયાન એક વકીલે કોર્ટ સમક્ષ દલીલ કરી હતી કે વિરોધ કરી રહેલા વિદ્યાર્થીઓ સામે પોલીસ દ્વારા કડક કાર્યવાહી કરવામાં આવી છે અને તેના અનેક વીડિયો ઉપલબ્ધ છે. તેમણે કોર્ટને વીડિયો જોઈ આ મામલાની ગંભીરતા સમજવા તેમજ સ્વયં સંજ્ઞાન લઈ કાર્યવાહી કરવા અપીલ કરી હતી.

જોકે, ચીફ જસ્ટિસ સૂર્યકાંતે વકીલની રજૂઆત વચ્ચે જ કહ્યું કે કોર્ટને વીડિયો જોવામાં કોઈ રસ નથી, કારણ કે તેની પાસે એટલો સમય નથી. તેમણે વકીલને ટોકતાં કહ્યું કે, "અમારી પાસે વીડિયો જોવા માટે સમય નથી." સાથે જ કોર્ટનો સમય અને પોતાનો સમય બગાડવા બદલ પણ વકીલને ટકોર કરી હતી.

વકીલે વધુમાં જણાવ્યું હતું કે વિરોધ કરી રહેલા વિદ્યાર્થીઓ નીટ પરીક્ષાનું પારદર્શક આયોજન અને નેશનલ ટેસ્ટિંગ એજન્સી (NTA)માં સુધારાની માંગ કરી રહ્યા છે. વિદ્યાર્થીઓનું કહેવું છે કે પરીક્ષા પ્રણાલીમાં જરૂરી સુધારા કરવામાં આવે જેથી ભવિષ્યમાં આવી ખામીઓ અને વિવાદો ફરી સર્જાય નહીં.