વોશિંગ્ટન ડીસી- અમેરિકાની રાજધાની વોશિંગ્ટન ડીસી હવે રાષ્ટ્રપતિ ડોનાલ્ડ ટ્રમ્પ અને મેયર મ્યુરિયલ બાઉઝર વચ્ચેના રાજકીય સંઘર્ષનું કેન્દ્ર બની ગઈ છે. ટ્રમ્પ પ્રશાસને અહીં કાયદો અને વ્યવસ્થા જાળવવાના નામે ત્રણ રિપબ્લિકન રાજ્યોમાંથી લગભગ 700 નેશનલ ગાર્ડ સૈનિકો તૈનાત કરવાનો આદેશ આપ્યો છે, જેને સ્થાનિક પ્રશાસને અનેક સવાલો ઉભા કરીને વખોડી કાઢ્યો છે. ટ્રમ્પે વ્હાઇટ હાઉસમાં એક પ્રેસ કોન્ફરન્સમાં દાવો કર્યો હતો કે રાજધાનીમાં હિંસક ગુનાઓ અને અરાજકતા એટલી વધી ગઈ છે કે અહીંનો હત્યા દર બોગોટા, મેક્સિકો સિટી અને ઇસ્લામાબાદ જેવા શહેરો કરતાં પણ વધુ છે. તેમણે આ સ્થિતિને "જાહેર સુરક્ષા કટોકટી" ગણાવીને પોતાની સરકારને 'હિંસક ગેંગ અને અપરાધીઓથી રાજધાનીને મુક્ત કરાવવાનો' સંકલ્પ વ્યક્ત કર્યો.

જોકે, બાઉઝરે ટ્રમ્પના દાવાઓને સીધા જ પડકાર્યા છે. તેમણે કહ્યું કે, વોશિંગ્ટન ડીસીમાં 2024માં હિંસક ગુનાઓ 30 વર્ષના સૌથી નીચલા સ્તરે હતા અને 2025ના પ્રથમ છ મહિનામાં પણ તેમાં 26 ટકાનો વધુ ઘટાડો નોંધાયો છે. ડેટા મુજબ, 2024માં હત્યા દર પ્રતિ એક લાખે 27.3 હતો, જે 2023ના 39.4 કરતાં ઘણો ઓછો છે. 

બાઉઝરના મતે, ટ્રમ્પનું આ પગલું વાસ્તવિકતાથી દૂર અને રાજનીતિથી પ્રેરિત છે, જે સ્થાનિક વહીવટીતંત્રની સ્વાયત્તતા માટે મોટો પડકાર છે. વેસ્ટ વર્જિનિયા અને સાઉથ કેરોલિના જેવા રિપબ્લિકન રાજ્યોએ તાત્કાલિક સૈનિકો મોકલવાની પ્રતિબદ્ધતા વ્યક્ત કરી છે. આ સૈનિકો સ્થાનિક પોલીસ સાથે મળીને ફેડરલ સંપત્તિઓની સુરક્ષા પર ધ્યાન કેન્દ્રિત કરશે.