અમેરિકાના રાષ્ટ્રપ્રમુખ ડોનાલ્ડ ટ્રમ્પ શાંતિ નોબેલ મેળવવાની લાલચમાં યુક્રેનના ટુકડા કરવા બેઠા હોય તેવું દેખાઈ રહ્યું છે. આમ તો તેઓ રશિયા-યુક્રેનનું યુદ્ધ અટકાવવા માટે તમામ પ્રયાસો કરી રહ્યા છે. તાજેતરમાં જ તેમણે યુદ્ધ મામલે રશિયાના રાષ્ટ્રપ્રમુખ વ્લાદિમીર પુતિન સાથે બેઠક કરી હતી. અગાઉ તેમણે યુક્રેનને નાટોમાં સમાવવા માટે વિશ્વાસ પણ આપ્યો હતો, જોકે હવે તેઓ જાહેરમાં બોલી રહ્યા છે કે, યુક્રેન ક્રીમિયા શહેરને ભુલી જાય. એટલું જ નહીં ટ્રમ્પ ડોનેટ્સ્ક અને લુહાન્સ્ક જેવા મોટા શહેરો પણ રશિયાને આપી દેવાના પક્ષમાં છે. રિપોર્ટ મુજબ ટ્રમ્પ અને યુક્રેનના રાષ્ટ્રપ્રમુખ વ્લોદોમિર ઝેલેન્સ્કી વચ્ચે બેઠક યોજાવાની છે. આ દરમિયાન ટ્રમ્પ ક્રીમિયા, ડોનેટ્સ્ક અને લુહાન્સ્ક જેવા મોટા શહેરો રશિયાને આપી દેવા માટે ઝેલેન્સ્કીને વાત કરે તેવી સંભાવના છે. જ્યારે ટ્રમ્પ અને પુતિન વચ્ચે બેઠક યોજવાની વાતો સામે આવી હતી, ત્યારે ઝેલેન્સ્કીએ વાંધો ઉઠાવ્યો હતો અને કહ્યું હતું કે, ‘અમેરિકા અમારા વગર પુતિન સાથે બેઠક યોજી રહ્યું છે. બેઠકમાં કોઈપણ ચર્ચા થાય, પરંતુ અમે અમારા હિતો વિરુદ્ધનો કોઈપણ નિર્ણય સ્વિકારીશું નહીં.’ આમ જોઈએ તો ટ્રમ્પ યુક્રેનને નુકસાન પહોંચાડીને યુદ્ધ બંધ કરાવવા માંગતા હોય તેવું દેખાઈ રહ્યું છે. સીએનએન, ન્યૂયોર્ક ટાઈમ્સ જેવી મીડિયા રાજદ્વારી રીતે ટ્રમ્પ-પુતિનની બેઠકને ટ્રમ્પની નિષ્ફળતા તરીકે જોઈ રહ્યા છે. અમેરિકન મીડિયાનું કહેવું છે કે, ‘અલાસ્કામાં યોજાયેલી બેઠકના કારણે પુતિન અને રશિયાને મુખ્ય કેન્દ્ર બનવાની તક મલી છે. બેઠક પછી જે વાતો સામે આવી છે, તેનાથી લાગી રહ્યું છે કે, ટ્રમ્પે પુતિનની શરતો માનીને જ બેઠક કરી છે.’ ટ્રમ્પની ઈચ્છા છે કે, યુદ્ધવિરામ માટે પુતિને જે શરતો મુકી છે, તે શરતોથી યુક્રેન રાજી થઈ જાય. સ્થિતિ એવી છે કે, ખુલ ઝેલેન્સ્કીનું માનવું છે કે, ટ્રમ્પ સાથે પુતિનની બેઠકમાં રશિયાની જ જીત થઈ છે. ખાસ વાત એ છે કે, હજુ ટ્રમ્પ અને ઝેલેન્સ્કી વચ્ચે બેઠક યોજાવાની છે, જેમાં યુરોપના ટોચના નેતાઓ પણ જવાના છે. એવું કહેવાય છે કે, ટ્રમ્પે યુક્રેનના શહેરો રશિયાને આપી દેવાની જે વાતો કરી છે, તેનાથી અનેક દેશો નારાજ છે. ટ્રમ્પ સાથે બેઠક યોજાય તે પહેલા ઝેલેન્સ્કી એલર્ટ થઈ ગયા છે, તેથી જ તેઓ યુરોપિયન નેતાઓને સાથે રાખીને ટ્રમ્પ સાથે બેઠક યોજવાના છે. અગાઉ ફેબ્રુઆરીમાં અમેરિકા પહોંચેલા ઝેલેન્સ્કી (Ukraine President Volodymyr Zelenskyy) અને ટ્રમ્પ (US President Donald Trump) વચ્ચે બોલાચાલી થઈ હતી. ટ્રમ્પે યુક્રેનનો ઘણો દબાવવાનો પ્રયાસ કર્યો હતો. ત્યારે આ જ કારણે ઝેલેન્સ્કી યુરોપિયન નેતાઓને સાથે રાખી ફરી ટ્રમ્પ સાથે બેઠક કરવાની યોજના ધરાવતા હોઈ શકે છે. હવે યુરોપિયન નેતાઓની હાજરીથી આશા છે કે યુક્રેન પર કોઈપણ પ્રકારનું દબાણ ન આવે અને શાંતિ સમજૂતીની દિશામાં પારદર્શિતા જળવાઈ રહે.