અમેરિકાના પ્રમુખ ડોનલ્ડ ટ્રમ્પે ‘બર્થ ટૂરિઝમ’ એટલે કે અમેરિકી નાગરિકતા મેળવવાના હેતુથી અમેરિકામાં બાળકને જન્મ આપવા આવતી ગર્ભવતી મહિલાઓની પ્રથા સામે કડક કાર્યવાહી કરી છે. ટ્રમ્પે આ પ્રથા પર પ્રતિબંધ મૂકતા 2 નવા એક્ઝિક્યુટિવ ઑર્ડર પર હસ્તાક્ષર કર્યા છે. નવા આદેશમાં વીઝા રદ કરવા, કાયમી પ્રવેશબંધી અને દેશનિકાલ સહિતની સજાત્મક જોગવાઈ કરવામાં આવી છે.

થોડા સમય પહેલાં અમેરિકન સુપ્રીમ કોર્ટે 14મા બંધારણીય સુધારા હેઠળ જન્મજાત નાગરિકતાને બંધારણીય અધિકાર ગણાવી ટ્રમ્પના અગાઉના પ્રયાસને ફગાવી દીધો હતો. ટ્રમ્પે આ નિર્ણયને અત્યંત દુર્ભાગ્યપૂર્ણ ગણાવ્યો હતો. તેમણે હવે વિદેશી આતંકવાદી સંગઠનોના સભ્યો, વિદેશી સરકારના કર્મચારીઓ અને છેતરપિંડીથી નાગરિકતા મેળવનારા લોકોનાં બાળકોને આ અધિકારથી વંચિત રાખવા માટે નવો કાયદાકીય પાસો ફેંક્યો છે.

આંકડા મુજબ દર વર્ષે આશરે 22,000થી 26,000 બાળકોનો જન્મ ‘બર્થ ટૂરિઝમ’ હેઠળ થાય છે. નવા નિયમ મુજબ આ પ્રથાનો સહારો લેનારા લોકોને અમેરિકામાં કાયમી પ્રવેશબંધી કરવામાં આવશે અને તેમની પાસેના તમામ વર્તમાન વીઝા તાત્કાલિક રદ કરી દેવાશે. ભૂતકાળમાં ‘બર્થ ટૂરિઝમ’ દ્વારા નાગરિકતા મેળવીને અમેરિકામાં રહેતા લોકોને શોધી દેશનિકાલ કરવામાં આવશે. ગર્ભવતી મહિલાઓને અમેરિકા લાવવાનો ગેરકાયદે કારોબાર અને રૅકેટ ચલાવતી એજન્સીઓ તથા ઑપરેટર્સ સામે પણ આકરા કાયદાકીય પગલાં લેવાશે. બીજી તરફ અમેરિકન સિવિલ લિબર્ટીઝ યુનિયન (ACLU)એ આ આદેશને ગેરબંધારણીય ગણાવી ફરી કોર્ટમાં પડકારવાની તૈયારી દર્શાવી છે. અમેરિકન ઇમિગ્રેશન નીતિ અને નાગરિકતાના ક્ષેત્રમાં આ સમગ્ર કાયદાકીય ઘટનાક્રમને અત્યંત મહત્ત્વપૂર્ણ માનવામાં આવે છે.