સામાન્ય રીતે જ્યારે વિશ્વમાં યુદ્ધ જેવી સ્થિતિ સર્જાય ત્યારે સોના-ચાંદીના ભાવ આસમાને પહોંચતા હોય છે, પરંતુ અત્યારે ઉલટી ગંગા વહી રહી છે. અમેરિકા અને ઈરાન વચ્ચે યુદ્ધ ચરમસીમાએ હોવા છતાં, ભારતીય વાયદા બજાર (MCX) ખુલતાની સાથે જ કિંમતી ધાતુઓના ભાવમાં મોટો ઘટાડો જોવા મળ્યો છે.

ચાંદીમાં ₹2800 થી વધુનો ઘટાડો

સોમવારે માર્કેટ ખુલતાની સાથે જ ચાંદીના ભાવમાં મોટું ગાબડું પડ્યું હતું. ગત સપ્તાહે ચાંદી ₹2,32,495 પર બંધ થઈ હતી, જે આજે ઘટીને ₹2,29,651 પર ખૂલી હતી. આમ, ચાંદી એક જ દિવસમાં ₹2,844 પ્રતિ કિલો સસ્તી થઈ છે. નોંધનીય છે કે ચાંદી તેના ઓલ-ટાઇમ હાઈ લેવલથી હવે લગભગ ₹2.09 લાખ જેટલી સસ્તી મળી રહી છે.

સોનાની વાત કરીએ તો, 10 ગ્રામ સોનાનો ભાવ પણ ₹1,382 જેટલો ઘટી ગયો છે. ગત સપ્તાહે સોનું ₹1,49,680 પર બંધ રહ્યું હતું, જે આજે ઘટીને ₹1,48,298 પ્રતિ 10 ગ્રામ પર ટ્રેડ થઈ રહ્યું છે. સોનું તેના ઉચ્ચતમ સ્તરથી અત્યારે ₹54,686 જેટલું સસ્તું થયું છે.

યુદ્ધ છતાં ભાવ કેમ ઘટ્યા?

વૈશ્વિક તણાવ અને ટ્રમ્પની ઈરાનને મળેલી ધમકીઓ છતાં ભાવ ઘટવા પાછળના મુખ્ય કારણો:

ડોલરની મજબૂતી: વૈશ્વિક બજારમાં અમેરિકી ડોલર વધુ મજબૂત બની રહ્યો છે, જેની સીધી અસર સોનાના ભાવ પર પડે છે.

કેશની માંગ: અનિશ્ચિતતાના માહોલમાં રોકાણકારો સોનામાં રોકાણ કરવાને બદલે હાથમાં રોકડ (Cash) રાખવાનું વધુ પસંદ કરી રહ્યા છે.

ક્રૂડ ઓઈલની અસર: કાચા તેલના ભાવ $110 ને પાર કરી જતાં મોંઘવારીનો ભય વધ્યો છે, જેના દબાણ હેઠળ કિંમતી ધાતુઓ દબાયેલી છે.