અમેરિકા અને ઈરાન વચ્ચેની શાંતિ મંત્રણા નિષ્ફળ જતાં તેની સીધી અને નકારાત્મક અસર ભારતીય શેરબજાર પર પડી છે. વૈશ્વિક સ્તરે વધેલા ભૂ-રાજકીય તણાવને પગલે સપ્તાહના પ્રથમ દિવસે સોમવારે બજાર ખૂલતાં જ રોકાણકારોમાં ભારે ગભરાટ જોવા મળ્યો હતો. આ વૈશ્વિક અશાંતિના ડરથી બજારમાં જંગી વેચવાલી નીકળતા સેન્સેક્સ અને નિફ્ટીમાં મોટો કડાકો નોંધાયો છે.

શેરબજારમાં ચોમેર વેચવાલીના દબાણ હેઠળ BSE SENSEX તેના અગાઉના 77,550.25 ના બંધ ભાવ સામે નબળાઈ સાથે 75,937.16 ના મથાળે ખૂલ્યો હતો. શરૂઆતી કારોબારમાં જ ઘટાડો આગળ વધતા સેન્સેક્સ 1,626.93 પોઈન્ટ એટલે કે 2.10 ટકા તૂટીને 75,923.32 ના સ્તર સુધી નીચે પટકાયો હતો. આજના દિવસના ટ્રેડિંગ સત્ર દરમિયાન સેન્સેક્સમાં 76,339.30 ની ઊંચી અને 75,868.32 ની નીચી સપાટી જોવા મળી હતી.

સેન્સેક્સની જેમ NIFTY 50 ઇન્ડેક્સમાં પણ રોકાણકારોએ નુકસાનીનો સામનો કરવો પડ્યો છે. નિફ્ટી તેના ગત સત્રના 24,050.60 ના બંધ સામે 23,589.60 પર ઓપન થયો હતો. બજારમાં સતત ઘટાડાના કારણે નિફ્ટી 474.60 પોઈન્ટ એટલે કે 1.97 ટકા તૂટીને 23,576.00 ના લેવલ પર પહોંચી ગયો હતો. દિવસ દરમિયાન નિફ્ટીએ 23,699.70 નો હાઈ અને 23,555.60 નો લો બનાવ્યો હતો.