મુંબઈઃ મહાનાયક અમિતાભ બચ્ચન તેમના સ્વાસ્થ્યને લઈને ચર્ચામાં છે. મંગળવારે રાત્રે તેમને હૉસ્પિટલમાં દાખલ કરવામાં આવ્યા હોવાના અહેવાલો વહેતા થયા હતા, જોકે તેઓ રૂટિન ચેકઅપ માટે ગયા હોવાનું સામે આવ્યું હતું. હૉસ્પિટલમાં દાખલ થયાની આ અટકળો વચ્ચે અમિતાભ બચ્ચને સોશિયલ મીડિયા પર એક એવી પોસ્ટ કરી છે, જેના કારણે ચાહકોમાં તેમની બીમારીને લઈને ચિંતા વધી ગઈ છે અને લોકો તેના અલગ અલગ અર્થ કાઢી રહ્યા છે.

20 મેના રોજ સવારે અમિતાભ બચ્ચને એક્સ પર પોસ્ટ કરીને માત્ર 'પિલોરી - બડુંબા' લખ્યું હતું. આ પોસ્ટ જોઈને યુઝર્સે અલગ અલગ અર્થ કાઢવાનું શરૂ કર્યું હતું. હેલિકોબેક્ટર પાયલોરીના ચેપને સામાન્ય બોલચાલની ભાષામાં ઘણા લોકો પાયલોરી, પિલોરી કે બડુંબા પણ કહે છે. આ એક પ્રકારનું બેક્ટેરિયલ ઇન્ફેક્શન છે, જેમાં દર્દીને પેટના ઉપરના ભાગમાં દુખાવો અને અપચાની સમસ્યા થાય છે. ઘણા લોકોનું માનવું છે કે બિગ બીને પિલોરીના કારણે તકલીફ થઈ હતી અને તેના લીધે જ તેમને હૉસ્પિટલમાં દાખલ કરવામાં આવ્યા હતા.

અમિતાભ બચ્ચનની આ પિલોરીવાળી પોસ્ટ જોયા પછી યુઝર્સ સતત પોતાની પ્રતિક્રિયાઓ આપી રહ્યા છે. એક યુઝરે લખ્યું હતું કે કદાચ હૉસ્પિટલમાં દાખલ થવાના સમાચાર સંપૂર્ણપણે ખોટા નહોતા. તો અન્ય એક યુઝરે લખ્યું હતું કે આશા છે કે તમે પેટની પાયલોરીવાળી સમસ્યાથી પીડિત નથી. આ ઉપરાંત, કેટલાક લોકો તેમને આરામ કરવાની સલાહ પણ આપી રહ્યા છે. એક યુઝરે ચિંતા વ્યક્ત કરતા લખ્યું હતું કે તમે બીમાર છો, અત્યાર સુધી કેમ જાગો છો, સૂઈ જાઓ. જ્યારે અન્ય એક ચાહકે પૂછ્યું હતું કે સર તમારી તબિયત ઠીક તો છે ને.