નેશનલ સ્ટોક એક્સચેન્જના ઓગસ્ટ ડેટા મુજબ, ગુજરાતે નવા રોકાણકારોની નોંધણીમાં મોખરું સ્થાન મેળવ્યું છે. રાજ્યમાં આ મહિને 2.3 લાખ નવા રોકાણકારો ઉમેરાયા છે, જે કુલ માસિક ઉમેરાના 14.6 ટકા હિસ્સો ધરાવે છે. પ્રથમ વખત દેશના ટોપ-10માં ગુજરાતના પાંચ અને ટોપ-20માં દસ જિલ્લાઓ સામેલ થયા છે, જ્યારે અગાઉ સપ્ટેમ્બર 2024માં ચાર જિલ્લાઓ ટોપ-10માં હતા.

આ ઉછાળો માત્ર શહેરી કેન્દ્રો પૂરતો સીમિત નથી. અમદાવાદ, સુરત, ભાવનગર, રાજકોટ અને જૂનાગઢ ટોપ-10માં છે, જ્યારે મહેસાણા, વડોદરા, બનાસકાંઠા, સુરેન્દ્રનગર અને જામનગર ટોપ-20માં સ્થાન પામ્યા છે. આઈપીઓની લહેરે નાના જિલ્લાઓમાં પણ રોકાણકારો આકર્ષાયા છે.

રાજ્ય સ્તરે ગુજરાતે ઉત્તર પ્રદેશને પાછળ છોડી પ્રથમ ક્રમાંક પ્રાપ્ત કર્યો છે. ઉત્તર પ્રદેશે 2.0 લાખ, મહારાષ્ટ્રે 1.6 લાખ, રાજસ્થાને 1.1 લાખ અને તમિલનાડુએ 0.9 લાખ રોકાણકારો ઉમેર્યા હતા. જિલ્લા સ્તરે દિલ્હી-એનસીઆર 75,800, મુંબઈ 53,300 અને અમદાવાદ 35,400 નોંધણી સાથે આગળ રહ્યા હતા.

નાણાકીય વર્ષ 2010ના અંતે રાજ્યમાં 14.98 લાખ રોકાણકારો હતા, જે વધીને ઓગસ્ટ 2026 સુધીમાં 1.15 કરોડને પાર પહોંચ્યા છે. ગુજરાતમાં નવી નોંધણીમાં માસિક ધોરણે 94.8 ટકા અને વાર્ષિક ધોરણે 134.9 ટકાનો નોંધપાત્ર વધારો જોવા મળ્યો છે.