ગુજરાતમાં 26મી એપ્રિલ 2026ના રોજ યોજાયેલી સ્થાનિક સ્વરાજની સંસ્થાઓની મહત્વપૂર્ણ ચૂંટણી બાદ આજે એટલે કે 28મી એપ્રિલ 2026ના રોજ રાજ્યભરમાં મતગણતરી હાથ ધરવામાં આવી રહી છે. રાજકીય વિશ્લેષકો આ ચૂંટણીને આગામી વિધાનસભા ચૂંટણીની સેમી ફાઇનલ તરીકે જોઈ રહ્યા છે. રાજ્યની 15 મહાનગરપાલિકાઓથી લઈને જિલ્લા અને તાલુકા પંચાયતો સુધીનાં પરિણામો આજે સ્પષ્ટ થશે. નોંધનીય છે કે શહેરો કરતાં ગ્રામ્ય વિસ્તારોના મતદારોમાં નોંધપાત્ર ઉત્સાહ જોવા મળ્યો હતો. આ વખતે મહાનગરપાલિકાઓમાં 49.02, નગરપાલિકાઓમાં 59.50, નગરપાલિકાઓની પેટા ચૂંટણીમાં 55.38, જિલ્લા પંચાયતોમાં 61.69 અને તાલુકા પંચાયતોમાં 62.38 ટકા મતદાન નોંધાયું હતું.

જિલ્લા પંચાયતની કુલ 34 સંસ્થાઓના 1090 મતદાર મંડળોમાંથી 52 બેઠકો બિનહરીફ જાહેર થઈ હતી, જ્યારે બાકીની 1038 બેઠકો માટે 3059 ઉમેદવારો મેદાનમાં હતા. બીજી તરફ, 260 તાલુકા પંચાયતોના કુલ 5234 મતદાર મંડળોમાં 2 બેઠકો બિનહરીફ થઈ હતી અને 2 બેઠકો પર ઉમેદવારી ફોર્મ ભરાયાં નહોતાં. આથી તાલુકા પંચાયતની 4976 બેઠકો માટે 13,871 ઉમેદવારો વચ્ચે ચૂંટણી યોજાઈ હતી, જેનું પરિણામ આજે જાહેર થશે. બગસરા અને હળવદમાં આમ આદમી પાર્ટીની એન્ટ્રી થતાં રસાકસી વધવાની શક્યતા છે.