વડોદરા જિલ્લામાં પડી રહેલા અવિરત ભારે વરસાદના કારણે વાઘોડિયામાં આવેલી સુમનદીપ વિદ્યાપીઠની લક્ષ્મી હોસ્ટેલમાં પૂરના પાણી ઘૂસી જતાં મોટી દુર્ઘટનાનો ભય ઊભો થયો હતો. મધરાત્રે હોસ્ટેલમાં જળસ્તર વધવાની જાણ થતાં જ વાઘોડિયાના મામલતદાર, પોલીસ અને વહીવટી તંત્રની ટીમે તાત્કાલિક ઘટનાસ્થળે દોડી જઈને સઘન બચાવ કામગીરી હાથ ધરી હતી અને ફસાયેલા તમામ લોકોને ત્વરિત સુરક્ષિત રીતે બહાર કાઢ્યા હતા.

પ્રાપ્ત વિગતો અનુસાર, રાત્રે આશરે 3 વાગ્યાની આસપાસ હોસ્ટેલમાં પાણી ભરાવવાનું શરૂ થતાં જ વિદ્યાર્થીઓની સુરક્ષાને પ્રાધાન્ય આપીને રેસ્ક્યૂ ઓપરેશન શરૂ કરવામાં આવ્યું હતું. આ કામગીરીમાં કુલ 150 લોકોને સલામત સ્થળે ખસેડવામાં આવ્યા હતા, જેમાં 100 વિદ્યાર્થિનીઓ, 40 વિદ્યાર્થીઓ અને 10 શ્રમિકોનો સમાવેશ થાય છે. સરકારી તંત્ર દ્વારા તાબડતોબ લેવાયેલા આ પગલાંને પગલે કોઈપણ પ્રકારની જાનહાનિ કે ઈજા થઈ ન હોવાનું જાણવા મળ્યું છે.

હાલમાં જિલ્લામાં મેઘરાજાની ભારે સવારીને જોતાં સમગ્ર વહીવટી તંત્રને એલર્ટ મોડ પર રાખવામાં આવ્યું છે. સત્તાધીશોના જણાવ્યા પ્રમાણે, સાવચેતીના ભાગરૂપે તમામ નીચાણવાળા વિસ્તારો અને શૈક્ષણિક સંસ્થાઓની પરિસ્થિતિ પર સતત નજર રાખવામાં આવી રહી છે. તેમજ આગામી સમયમાં કોઈપણ કટોકટી સર્જાય તો રાહત અને બચાવ કામગીરી પહોંચાડવા માટે અગાઉથી જ પૂરતી વ્યવસ્થાઓ ગોઠવી દેવામાં આવી છે.