રાજ્યમાં સતત વરસી રહેલા ભારે વરસાદને કારણે અનેક જિલ્લાઓમાં પૂર જેવી સ્થિતિ સર્જાઈ છે. એક જ દિવસમાં 8 હજારથી વધુ લોકોને સુરક્ષિત સ્થળોએ ખસેડવામાં આવ્યા છે. નવસારીમાં 4 હજારથી વધુ, સુરતમાં 1,400થી વધુ, તાપીમાં 1,300થી વધુ, આણંદમાં 914 અને વડોદરામાં 300થી વધુ લોકોનું સ્થળાંતર કરાયું છે. વરસાદની અસરથી રાજ્યમાં 12 સ્ટેટ હાઈવે અને 252 રસ્તાઓ વાહનવ્યવહાર માટે બંધ કરવામાં આવ્યા છે. બચાવ કામગીરી માટે NDRFની 17, SDRFની 33 અને ભારતીય સેનાની 6 ટીમો અસરગ્રસ્ત વિસ્તારોમાં તૈનાત છે.

નવસારી જિલ્લાના ગણદેવીમાંથી પસાર થતી અંબિકા નદીનું જળસ્તર ભયજનક સપાટી 28 ફૂટ સામે વધીને 35 ફૂટે પહોંચતાં બીલીમોરા શહેરમાં પૂર જેવી સ્થિતિ સર્જાઈ છે. તેના કારણે અંદાજે 50 હજાર લોકો અસરગ્રસ્ત બન્યા છે. ઉપરાંત ગણદેવી અને વાંસદા તાલુકાના અંબિકા કાંઠાના 45 ગામો પણ પૂરની ઝપેટમાં આવ્યા છે. નદીમાં સતત વધી રહેલી પાણીની આવકને ધ્યાનમાં રાખીને તંત્ર એલર્ટ પર છે અને નીચાણવાળા વિસ્તારોના લોકોને સાવચેત રહેવાની અપીલ કરવામાં આવી રહી છે.

બીજી તરફ નવસારી શહેરના પૂર્વ વિસ્તારમાંથી પસાર થતી પૂર્ણા નદીનું જળસ્તર પણ હજુ ભયજનક સપાટીથી ઉપર છે. ભયજનક સપાટી 23 ફૂટ સામે પૂર્ણા નદી હાલમાં 28 ફૂટે વહેતી હોવાથી શહેરના 12 વિસ્તારોમાં પૂરનું પાણી ફરી વળ્યું છે. આ સ્થિતિમાં અંદાજે 1 લાખ લોકો પ્રભાવિત થયા છે. તંત્ર દ્વારા પરિસ્થિતિ પર સતત નજર રાખવામાં આવી રહી છે અને અસરગ્રસ્ત વિસ્તારોમાં બચાવ તથા રાહત કામગીરી ચાલુ છે.