અમદાવાદમાં CNGના સતત વધી રહેલા ભાવ અને રિક્ષાભાડામાં સમયસર વધારો ન કરવાના વિરોધમાં 5 અને 6 ઓગસ્ટની બે દિવસીય રિક્ષા હડતાળ શરૂ થઈ છે. પ્રગતિ રિક્ષા ચાલક એકતા યુનિયનના આહ્વાન બાદ શહેરમાં અંદાજે 1 લાખથી વધુ રિક્ષાઓના પૈડાં થંભી ગયા હોવાથી રોજિંદા હજારો મુસાફરોને અવરજવરમાં ભારે મુશ્કેલીઓનો સામનો કરવો પડી રહ્યો છે.

રિક્ષાચાલકોના જણાવ્યા મુજબ 1 ઓગસ્ટે CNGના ભાવમાં એકસાથે 4 રૂપિયાનો વધારો થતાં તેમની આવક પર સીધી અસર પડી છે. ટ્રાન્સપોર્ટ કમિશનર સાથે ભાડા વધારા અંગે ચર્ચા દરમિયાન સહમતિ બનવા છતાં સરકાર તરફથી હજુ સુધી સત્તાવાર નોટિફિકેશન જાહેર ન થતાં ચાલકોમાં રોષ વ્યાપ્યો છે.

હડતાળના કારણે વિદ્યાર્થીઓ, નોકરીયાતો અને અન્ય મુસાફરોને રેલવે સ્ટેશન, બસ સ્ટેન્ડ તેમજ હોસ્પિટલ સહિતના સ્થળોએ પહોંચવા માટે સિટી બસ અને અન્ય વૈકલ્પિક પરિવહન સેવાઓનો સહારો લેવો પડી રહ્યો છે.

જોકે હડતાળને શહેરમાં મિશ્ર પ્રતિસાદ મળ્યો છે. નિયમિત રૂટ પર દોડતી શટલ રિક્ષાઓ હડતાળમાં જોડાઈ નહોતી. એસજી હાઇવે, પ્રહલાદનગર રોડ સહિતના વિસ્તારોમાં શટલ રિક્ષાઓ રાબેતા મુજબ ચાલુ રહેતાં અનેક સ્થળોએ રિક્ષા સેવા યથાવત જોવા મળી હતી.