અમદાવાદમાં સતત બે દિવસથી વરસી રહેલા ભારે વરસાદે છેલ્લા 20 વર્ષનો રેકોર્ડ તોડી નાખ્યો છે. બોપલ વિસ્તારમાં ઐતિહાસિક 20 ઇંચ જેટલો વરસાદ નોંધાયો છે. ભારે વરસાદને કારણે શહેરના અનેક વિસ્તારોમાં પાણી ભરાઈ ગયા છે. અનંત નેશનલ યુનિવર્સિટી પાછળના વિસ્તારો અને ઘુમાથી મણિપુરને જોડતા માર્ગ આસપાસના ખેતરો જળમગ્ન બન્યા છે, જ્યારે સંસ્કારધામ પાછળ આવેલ AUDAનું નવનિર્મિત તળાવ પણ છલકાઈ ગયું છે.

અનંત નેશનલ યુનિવર્સિટી પાછળના તમામ રસ્તાઓ પાણીમાં ગરકાવ થતાં વાહનવ્યવહાર અને સ્થાનિક લોકોની અવરજવરમાં ભારે મુશ્કેલી સર્જાઈ છે. સતત વરસાદને કારણે શહેરના અનેક વિસ્તારોમાં જળબંબાકાર જેવી સ્થિતિ જોવા મળી રહી છે.

હવામાન વિભાગે આગામી ત્રણ કલાક માટે કચ્છ, ખેડા, વડોદરા અને ભરૂચ જિલ્લામાં કલાકના 15 મિમી સુધીના ભારે વરસાદ, 41થી 61 કિલોમીટર પ્રતિ કલાકની ઝડપે પવન અને વીજળી પડવાની સંભાવના વ્યક્ત કરી છે. ઉપરાંત બનાસકાંઠા, પાટણ, મહેસાણા, ગાંધીનગર, અમદાવાદ, આણંદ, પંચમહાલ, સુરત, મોરબી, સુરેન્દ્રનગર, બોટાદ, ભાવનગર, જામનગર, રાજકોટ, અમરેલી, દેવભૂમિ દ્વારકા, પોરબંદર, જૂનાગઢ, ગીર સોમનાથ અને દીવ સહિતના વિસ્તારોમાં મધ્યમ વરસાદની આગાહી કરવામાં આવી છે.

સાબરકાંઠા, અરવલ્લી, મહીસાગર, દાહોદ, છોટાઉદેપુર, નર્મદા, તાપી, ડાંગ, નવસારી, દાદરા અને નગર હવેલી તેમજ વલસાડ જિલ્લામાં પણ છૂટાછવાયા હળવા વરસાદની શક્યતા વ્યક્ત કરવામાં આવી છે. સાથે જ વાદળછાયું વાતાવરણ અને કેટલાક વિસ્તારોમાં વીજળી પડવાની સંભાવનાને ધ્યાનમાં રાખીને લોકોને સાવચેતી રાખવાની અપીલ કરવામાં આવી છે.