દમણ : ડાભેલ વિસ્તારમાંથી બિહારમાં નક્સલવાદી જૂથનો સાગરિતને ઝડપી પાડવામાં આવ્યો છે. પોલીસે બાતમીના આધારે આરોપીની ધરપકડ કરી છે. આરોપી વિરુદ્ધમાં બિહારમાં હત્યા સહિત ત્રણ ગંભીર ગુના નોંધાયેલા છે. સમગ્ર મામલે બિહાર પોલીસે ટ્રાન્ઝિટ રિમાન્ડના આધારે આરોપીનો કબજોને લઈને આગળની કાર્યવાહી હાથ ધરી છે. 

દમણ પોલીસને બિહાર પોલીસે નક્સલવાદી જૂથ સાથે સંકળાયેલો અને હત્યા સહિતના ત્રણ ગુનામાં વોન્ટેડ આરોપી મનોજ મંગરુ હાંસદા દમણના ડાભેલ વિસ્તારમાં હોવાની જાણકારી આપી હતી. આ પછી દમણની સ્થાનિક પોલીસ અને લોકલ ક્રાઇમ બ્રાન્ચે જુદી જુદી ટીમો બનાવી કુખ્યાત ગુનેગારને પકડવા સઘન શોધખોળ આદરી હતી. જેમાં પોલીસની ટીમે શોધખોળ દરમિયાન આરોપી મનોજ હાંસદા (ઉં.વ.31)ને પકડી પાડયો હતો.
દમણ પોલીસે બિહાર પોલીસને આરોપીના ફોટા વોટ્સએપ પર મોકલ્યા બાદ આરોપીની પુષ્ટિ કરાઈ હતી. બિહાર પોલીસની ટીમ દમણ પહોંચ્યા બાદ આરોપીને દમણ કોર્ટમાં રજૂ કરી ટ્રાન્ઝિટ રિમાન્ડના આધારે આરોપી મનોજ હાંસદાનો કબજો લીધો હતો.